ஜ منتدى عراق المحبة ஜ
عزيزي الزائر / عزيزتي الزائرة يرجي التكرم بتسجبل الدخول اذا كنت عضو معنا
او التسجيل ان لم تكن عضو وترغب في الانضمام الي اسرة المنتدي
سنتشرف بتسجيلك
شكرا
ادارة المنتدى

ஜ منتدى عراق المحبة ஜ

҉ਿ°●φ¸¸.»»عساكم بخير يا أحلى اعضاء ««.¸¸φ●°ੀ҉
 
الرئيسيةاليوميةس .و .جبحـثالأعضاءالمجموعاتالتسجيلدخول

شاطر | 
 

 لو عندك 11 جاهل..شلون راح تتنتحر...قصدي شراح اتسوي؟؟

اذهب الى الأسفل 
كاتب الموضوعرسالة
كرار الوزان
مدير المنتدى
مدير المنتدى
avatar

الجنس : ذكر
عدد المساهمات : 154
تاريخ التسجيل : 04/07/2009
العمر : 28

مُساهمةموضوع: لو عندك 11 جاهل..شلون راح تتنتحر...قصدي شراح اتسوي؟؟   الجمعة يوليو 31, 2009 7:16 am

لسلام عليكم ,, و فجأة ,, و قبل ما ينطفي المي ,, و قبل ما اشغل الماطور حتى اصعد وطنية للتانكي ,, اتدعبلت غبى بالي فكرة عويصة الملامح و محاطة بفطارة مزمنة ,, شنو احساساتك و شعورياتك لو لا سماح الله – أكيد لا سامح الله – طبعا لا سامح الله- كللش لا سامح الله ,,, لو شفت روحك متزوج و عندك 11 ولد؟؟؟؟

خلي نختار الاسماء تخربطيا (عشوائيا )
سمير (الجبير و أول المصايب ) – احمد – جبار – سعد – كامل – حيدر – علي – مصطفى – ياسين – عمر – سيف

مثلا يعني ,,

شنو المواقف اللي ممكن الواحد اتصادقه و عندة 11 ولد ؟؟
راح ترجع من شغلك البابا مال البابا مسموط ,, صاير دنبك ,, و شايل جيس بي فلفل اخضر و بجيبك خيارتين (المسواك ),, من راس الشارع راح تسمع الهوسة مال ولدك ,, اتكول مو بيت ,, عبالك ملعب الشعب و هوسة مال جمهور جاي يشوف لعبة الزوراء و الجوية ,, و مرتك كاعدة تكفخ بهذا و بذاك و ما اتلحك ,, و حتى اتسيطر تشمر رمانه بنص المطبخ تكتل 5 حتى ال 6 الباقيين يكعدون عقال

اتطب ,, بس تفتح الباب ,, يهجمون عليك 11 نفر ,, هذا يحضن بيك , هذاك يعضعض بفانيلتك مشتبه بيها لفة همبركر ,, الثالث يكمز فوك قندرتك و الخامس اتدور عليه ما تلكاه اخر شي تلكاه متسلقك و شايل علم العراق و واكف فوك راسك ايرفرف بي مثل الخبل ,, و الفقير مالتهم حاضن خشمك و يبوس بيه عباله نانسي عجرم ,,
و الكل يصيحون
- هلو بابا ,,, هلو بابا,, هلو بابا,, هلو بابا,, هلو بابا,,, هلو بابا ,,, هلو بابا,, هلو بابا,, هلو بابا,, هلو بابا
عبالك انتة صارلك 23 سنة ببوكا و هسة هدوك او عبالك اليوم يلا مرتك كلتلهم انه انتة ابوهم و ما جانو يدرون

تفقد اعصابك و اتصيح
- ولج يا مرة تعاي اخذي آخر رجال الموهيكانز ذولة مو خبلووووووووووووووني ,, لو بعد بس اكو 2 زيادة اخذهم لامريكا بساعتين انسقط واشنطن ,,

- ولكف كاااااااااااااااااااااااااااااااافي
طبعا ماكو فائدة و الى ان تخلص من حفل الاستقبال هذا روحك تطلع , تلكه فانيلتك اختفت (انخمطت بالهوسة) و الخيارتين اللي بجيب بنطرونك اللي جايبهن للغدة مبيوكة , تك جواريبك اليمنة مخموط و قميصك متملخ ,, اتكول هادين عليك 11 ديج متقاعد مو 11 ولد
تمشي و انتة فرحان ,, تكتشف اكو حركة بجيبك اليمنة مال بنطرون
اتمد ايدك تجيك عضة و اتصيح ,, اتطلع ايدك تلكه طالع ويا احمد و مجلب بالسبابة حيل ,,
- لك وخر بابا شصخم هنا؟ احد كلك جيبي فندق؟؟ امشي اطلع برة ابن ال ,,

يفوتلك واحد يكلك نجحت ..
- مبروك ابني سمير عال نجاح , بس دير بالك ترة الخامس ابتدائي صعب ,, شد حيلك عال سنة الجاية قصدي
- بابا هاي ثبيك؟ اني مو ثمير اني ياسين , و نجحت من الحضانة للروضة
- اي مو دا اكول بعدك صغير مو مال رابع ابتدائي ,, اكول انتة اكيد ويانة؟ يعني اخوانك اتعرفو عليك؟ انتة ابني؟ اعذرني شوية حبيبي بس مرات ابوك يزومل
- اي بابا اني ابنك ,, اثلا ثارلي هواية هنا
- امثي يبوو قصدي امشي ابني روح ارجع بس لا اتسوون هوسة دمرتوني قبل شوية ,, 11 واحد و عندك الحساب
- لالا بابا جنا بث اني و حيدر
- هاي بث قصدي بس انتة و حيدر كل هاي الهوسة؟ لعد لو البقية كلهم جان شصار؟ جان وكع البيت على خشمي و خشم الخلفني؟


تريد تطلع من غرفتك ,, تعثر بواحد من ولدك و توكع ,, توك دا تفتح حلك و اتريد اتفشر ,, تعثر باللاخ و توكع بحيث حتى الفشار يطير من خشمك ,, قصدي من حلكك ,, (حسب انتة من وين اتفشر اكو اذا وارد امريكي يفشر من جعب رجله اليسرة )

- بابا اريد اتزوج
- انتة منو؟
- سيف
- سيف منو؟
- سيف ابنك
- ابني ابوك ما اعرفه ,, ابنك منو؟
- انتة بابا و اني سيف اللي مخلفني هاي شبيييك
- ابني لعد كامل وينة؟ هو اكيد اني مخلفة؟ شو صارلي سنتين ما شايفة شنو هاجر الكندا ؟ هو شكد عمره كامل؟
- كامل اصغر واحد عمرة 6 اشهر
- يعني اني خلفته لو بعد؟؟ والله نسيت هاي شلون شغلة
- اي بابا خلفته صار 6 اشهر ,, و لحد الان ما ندري بي وين ,, بس عمر يكول شافة مشمور يم الفريزر قبل شهرين ,,
- اي سيف تريد تتزوج ؟؟ انتة شكد عمرك
- دحش
- دحش؟؟؟ ايا جحش ,,,,,, عمرك 11 سنة و اتريد تتزوج ,, ليش مستعمل قصدي مستعجل .. يا مستعمل؟؟,, و انشالله ناوي اتخلفني 11 نفر هم؟؟
- اخلفك شلون بابا؟ انتة جبير عليه
- ولك دماغ الهدهد قصدي ناوي اتخلفلي هم 11 نفر؟؟حتى ورة جم سنة اعلك العلم الصيني بسطح بيتنا امشي اطلع برة ابن ال



اذا حاولتو اتطلعون فلازم تتخذ اجراءات معينة ,, التريلة اللي مشتريها (قابل 11 وين اتحطهم برينو؟) لا زم اتجيك التايرات ,, و لازم تتاكد ولا جاهل خاتل جوة الدشبول ,, وكفك ابو مرور و كلك مستمسكات تفتح الدشبول تنطي واحد من ولدك؟ شيصخم بي ؟ شيغرمة 30000 مصاصة؟ ما ترهم

اتروح للزوراء ,, حتى تتفرجون عال حيوانات , انتة و مرتك و 11 جاهل يكمزون داير مدايركم مثل الشوادي , و انتة لازم بلاايس و ملقط و اتهلس بشعر شعرك ,,شعر شعرك شنو قصدي شعر راسك ,, الى ان العالم يعوفون الحيوانات و يكومون يتفرجون عليك انتة و جهالك ,, بالاخير تطلع انتة ربحان موزاية شوية جوز حسب اللي انشمر عليكم ,,

تقرر تنتحر من ورة هال عدد المخيف مال الاولاد هم ما تكدر , تحاول تنتحر بالكهرباء تبقة حاضن الميزانية اسبوع و الكهرباء الله مطيح حظها و ماكو ,, تنتحر مسحوك هم ما تضمن ,, بدال ما اتموت يجوز تصكط و تصير معوق و تبقة طول عمرك شلشل نصفي وواكف على كرسي متحرك ,, قصدي كاعد ,,

يبقة الحل الوحيد ,, عزيزي الأب المنكوب ,, انه تتأمل يكبرون و يسحبوهم شلع كلهم للمنتخب و يسموه " أسود أبو سمير" و تتأمل انه يحققون انجاز تاريخي ,, مثل ال 3 اصفارة اللي جابوها اسودنا بكاس القارات الاخيرة


_________________




الرجوع الى أعلى الصفحة اذهب الى الأسفل
معاينة صفحة البيانات الشخصي للعضو http://iraq-lover.ba7r.org
 
لو عندك 11 جاهل..شلون راح تتنتحر...قصدي شراح اتسوي؟؟
الرجوع الى أعلى الصفحة 
صفحة 1 من اصل 1

صلاحيات هذا المنتدى:لاتستطيع الرد على المواضيع في هذا المنتدى
ஜ منتدى عراق المحبة ஜ :: منتديات التنحشيش :: منتدى التحشيش و القصائد التحشيشية-
انتقل الى: